Fyrstu tímarnir í verklega knapamerkjanáminu voru í dag, er nemendum kennt í tveimur hópum og eru þeir afar áhugasamir. Birna Tryggvadóttir reiðkennari er hér að kenna leyndardóma réttrar ásetu. 

(Af mbl.is)

Stjórn Seláss ehf hefur búið til reglur sem gilda í reiðhöllinni. Eru félagsmenn og aðrir notendur beðnir um að kynna sér þær og fara síðan eftir þeim. Það er afar mikilvægt að við öll sammælumst um það að ganga vel um og sýna hvert öðru tillitssemi. Reglurnar er að finna á undirsíðunni "Reiðhöllin" en einnig er þær að finna hérna undir.

Nú þegar eru áformuð nokkur mót og aðrir viðburðir í reiðhöllinni. Áður hefur verið getið um vetrarleika Faxa og Skugga en þeir fyrstu verða 13. febrúar. Félag tamningamanna áætlar að vera með kennslusýningu þann 9. febrúar. Eins ætlar Hrossaræktarsamband Vesturland  að halda kynbótasýningu 25. apríl n.k.Sem sagt margt framundan og eins gott að merkja við á dagatalinu. Ekki má svo gleyma vígsluhátíðinni þann 7. mars. 

Stjórn Hestamannafélagsins Skugga hefur ákveðið að setja á fót nýja heimasíðu, þar sem gamla heimasíðan okkar hefur verið til hálfgerðra  vandræða hvað varðar uppfærslur og umgengni.  Kerfið sem við höfðum valið var orðið úrelt og erfitt að eiga við fyrir leikmenn, sem ekki hafa sérþekkingu á flóknu forritunarumhverfi.  Gömlu heimasíðunni hefur því verið lokað og ný heimasíða tekur til starfa; www.hmfskuggi.is

Félagi okkar, Kristján Gíslason, hefur tekið að sér uppsetningu á nýrri heimasíðu og umsjón með henni næstu misserin.  Hefur Kristján unnið að þessu frá áramótum og blasir við okkur hér glæsilegur árangur, með fréttum og fróðleik um starfið hjá okkur í Skugga.  Stjórn Skugga er þakklát Kristjáni fyrir framtak hans og vilja til að sinna þessu starfi fyrir okkur og vonumst við í stjórn til að þessi miðill verði vel nýttur af félögum okkar, sem og öðrum þeim sem áhuga hafa á starfsemi okkar félags.  Ætlun Krisjáns er að uppfæra síðuna reglulega með fréttum af starfinu, fróðleik um félagið, myndum af félagsmönnum og starfsemi, gömlum og nýjum.  Við í stjórn Skugga þurfum því að vera dugleg að senda honum fréttir og eins er með nefndir félagsins, sem hafa hérna vettvang til að koma á framfæri auglýsingum um viðburði og uppákomur sem tengjast málefnum hestamanna og félagsstarfi okkar í Skugga.  Félagsmenn geta einnig sent póst á Kristján ef þeir vilja koma einhverju á framfæri, sem varðar starfsemina.

Félagsmenn eru hvattir til að fylgjast vel með framvindu mála og kíkja daglega inná heimasíðuna, til fróðleiks um hvað er í gangi hjá félaginu og hvaða viðburðir eru framundan.

Með kveðju,

Stefán Logi Haraldsson, formaður Hmf. Skugga

Stelpurnar í Skugga tóku sig til í vor og stofnuðu kvennadeild. Heitir félagsskapurinn Skuggadísir. Tilgangurinn er að efla félagsstarfið, gera eitthvað skemmtilegt saman og auka þannig samstöðuna. Nú hefur dagskrá vetrarins verið kynnt og er hana að finna hérna undir. Af dagskránni má ráða að heilmikið verður um að vera í vetur. Verða viðburðir kynntir hérna á þessum vettvangi er nær þeim dregur.

Hestamannafélagið hefur tryggt sér lénið hmfskuggi.is og verður heimasíðan því undir því nafni héðan í frá. Gamla heimasíðan, skuggi.info, mun því detta út enda hefur hún ekki verið virk í marga mánuði. Verður unnið að því að kynna síðuna sem víðast enda ætlum við að halda hérna úti lifandi síðu um félagsstarfið og hestamennskuna hérna.   

Hestamannafélagið Skuggi og Grunnskólinn í Borgarnesi eru í samstarfi um kennslu til prófs í Knapamerki 1. Grunnskólinn býður upp á bóklega þáttinn sem hluta af vali í 7.-10. bekk og síðan fá þeir nemendur sem taka verklega hlutann hann metinn sem valgrein á vorönn. Kennari er Birna Tryggvadóttir reiðkennari og hefst verklegi hlutinn í reiðhöllinni miðvikudaginn í næstu viku, þann 20. janúar. Eru nemendur afar áhugasamir um námið enda eru þeir að læra um sérstakt áhugamál sitt. Þeir sem vilja kynna sér út á hvað þetta nám gengur fá allar upplýsingar á heimasíðu verkefnisins hjá Hólaskóla. 

Mótanefndir félaganna Skugga og Faxa áforma að halda saman fjóra vetrarleika í reiðhöllinni í Borgarnesi. Þeir fyrstu eru fyrirhugaðir 13. febrúar og síðan eru leikar 13 mars, 27. mars og 10. apríl. Nánari upplýsingar, bæði um keppnisgreinar og annað er viðkemur mótunum verður kynnt fljótlega. Nú er bara að fara að þjálfa. 

Stjórn Skugga hélt stjórnarfund í kvöld. Margt var á dagskrá, má þar nefna heimasíðu, málefni reiðhallar - uppbygging og rekstur, mótahald, umgengnisreglur í hesthúsahverfi og margt fleira. Er frétta frá fundinum að vænta á næstunni.  

Eftirfarandi frétt er tekin af vef Skessuhorns (breytt dagsetning 12.1.10)

Hestamenn fjölmenna á landsmót í Skagafjörðinn í lok júní í sumar. Það byrjar sunnudaginn 28. júní og því lýkur sunnudaginn 4. júlí. Sem sagt lengsta landsmótið frá upphafi. Búið er að setja upp dagskrá og er hana að finna á heimasíðu mótsins . Reikna má með því að borgfirskir knapar og hestar láti að sér kveða þar. Því er ekki seinna vænna en fara að huga að undirbúningi.